Puisi Jawa

LINTANG-LINTANG


lintang-lintang abyor ing tawang
cumlorot sliweran nalika alihan
kumleyang mencok ing socamu asihku
cahyane gumebyar sunare gilar-gilar
ing telenge atimu sliramu tansah dakantu


lintang-lintang alihan
cumlorot telu ana pundhakku
kawitan lintang abang lintang perang
kapindho lintang mirunggan lintang kamanungsan
pungkasan lintang kumukus lintang kadurakan


Cerita Saka Manca


ing papan sarwa salju, aku
ngangen-angen lawang gubug binuka
ana bedhiyang lan lincak


nanging wis kebacut dadi salju
guritan apadene kekarepan
nglinthing bareng tumiyupe angin
nunjem-nunjem dom periih
sadawane wengi


kangmangka ing ngisor salju pinendhem candhi
sing durung kober kababar unine prasasti